Oct 1 | Ika-26 Linggo sa Karaniwang Panahon

#EbanghelyoNgayon #LiturgyFun #AngDalawangAnak

🦉📖 Gabay sa Pagninilay at Katekesis ✝️

Layuning Matularan Si Hesus, Ang Anak na Sumang-Ayon at Umayon

Ebanghelyo ngayong Linggo: Mateo 21:28-32

Ang Mabuting Balita ng Panginoon ayon kay San Mateo

Noong panahong iyon, sinabi ni Hesus sa mga punong saserdote at mga matatanda ng bayan: “Ano ang palagay ninyo rito? May isang tao na may dalawang anak na lalaki. Lumapit siya sa nakatatanda at sinabi, ‘Anak, lumabas ka at magtrabaho sa ubasan ngayon.’ ‘Ayoko po.’ tugon niya. Ngunit nagbago ang kanyang isip at siya’y naparoon. Lumapit din ang ama sa ikalawa at gayun din ang kanyang sinabi. ‘Opo’ tugon nito, ngunit hindi naman naparoon. Sino sa dalawa ang sumunod sa kalooban ng kanyang ama?” “Ang nakatatanda po,” sagot nila. Sinabi sa kanila ni Hesus, “Sinasabi ko sa inyo: ang mga publikano at masasamang babae’y nauuna pa sa inyong pasakop sa paghahari ng Diyos. Sapagkat naparito sa inyo si Juan at ipinakilala ang matuwid na pamumuhay, at hindi ninyo siya pinaniwalaan. Ngunit pinaniwalaan siya ng mga publikano at ng masasamang babae. Nakita ninyo ito, subalit hindi pa rin kayo nagsisi at naniwala sa kanya.”

Ang Mabuting Balita ng Panginoon.

A. Pagmamasid

Nangako ka na ba sa Diyos kapalit ng isang panalangin? Halimbawa may mahalaga kang exam na kailangang kailangan mong maipasa, tapos nagdasal ka na “Lord, kung ipapasa mo ako sa exam na ito, magsisimba na ako tuwing Linggo!” At sa pagsambit mo ng pangakong ito ay buo sa puso mo na tutupdin ito? Ano naman ang nangyari pagkatapos? Sinunod ba natin ang ating pangako? Sa Kabilang banda may mga utos at bilin sa ating ang ating mga magulang. Ano ang sinasabi natin kapag tayo ay inuutusan? Sinsasabi ba natin ay oo pero hindi natin ginagawa? O agad natin itong sinusunod?

“Sapagkat naparito sa inyo si Juan at ipinakilala ang matuwid na pamumuhay, at hindi ninyo siya pinaniwalaan. Ngunit pinaniwalaan siya ng mga publikano at ng masasamang babae.” Mateo 21:32

B. Paghahawi

Inilahad ni Hesus ang talinghaga ng dalawang anak kung saan ang unang anak ay kalaunang sumunod sa utos ng kanyang ama habang ang ikalawang anak naman ay sumuway sa kanyang pinag-uutos. Sinabi ni Jesus, “Talagang sinasabi ko sa inyo: mas nauuna sa inyo patungo sa kaharian ng Langit ang mga publikano at mga babaeng bayaran.

C. Pagtatabas

Hindi sapat ang ating mga salita at pangako sa Diyos at wala itong saysay kung hindi naman natin tinutupad at isinasabuhay ito.

D. Pagsasaayos

Inaanyayahan tayo na tumulong sa ubasan ng Panginoon, at malaya tayong sundin ang paanyaya. Nasa atin ngayon kung paano natin isasabuhay ang tawag na ito, sa kadahilanan ang bawat isa sa atin ay hinubog ng naayon sa galaw ng Espiritu Santo. Kaya huwag manghusga ng

Kapwa. Bagkus tignan ang sarili kung tayo ba mismo ay tumutugon at isinasabuhay ang Kanyang mga aral.

E. Pagdiriwang

Pagnilayan kung paano maisasabuhay ang isang aral ni Hesus. Magsimula sa mga malalapit sa ating buhay tulad ng ating pamilya o kapit-bahay.

I-download ang katolago worksheet para sa linggong ito mula sa ating FB page na www.fb.com/katolago o sa www.katolago.com

Sources:

Yaman ng Salita, Word and Life Publications

Paghahawan, Diocese of Novaliches

Pagninilay sa gabay ni Rev. Fr. Niño Etulle, SCJ

Ang Pagpapahayag ng Salita ng Diyos, Volume I & II. Karapatang-sipi © Panayam ng mga Katolikong Obispo sa Pilipinas 2014, Lupon Rehiyonal Ukol sa Tagalog sa Liturhiya, Archdiocesan Liturgical Commission, Manila.