Mar 19, 2023 | Ika-4 Linggo ng Kuwaresma

🦉📖 Gabay sa Pagninilay at Katekesis 😇

Si Kristo, Ang Liwanag ng Ating Buhay

Ebanghelyo ngayong Linggo: Juan 9, 1. 6-9. 13-17. 34-38

Ang Mabuting Balita ng Panginoon ayon kay San Juan

Noong panahong iyon: Sa paglalakad ni Hesus ay may nakita siyang isang lalaking ipinanganak na bulag. At si Hesus ay lumura sa lupa at gumawa ng putik. Ipinahid niya ito sa mata ng bulag. Sinabi sa kanya ni Hesus, “Pumunta ka sa deposito ng tubig sa Siloe.” (Ang kahulugan nito’y Sinugo.) “Maghilamos ka roon.” Gayon nga ang ginawa ng bulag at nang magbalik ay nakakita na.

Sinabi ng mga kapitbahay niya at ng mga nakakita sa kanya noong siya’y namamalimos pa, “Hindi ba iyan ang lalaking dating nagpapalimos?” Sumagot ang ilan, “Iyan nga!” “Hindi! Kamukha lang,” wika naman ng iba. At sumagot ang lalaki, “Ako nga po iyon.”

Dinala nila sa mga Pariseo ang dating bulag. Araw ng Pamamahinga nang gumawa si Hesus ng putik at padilatin ang bulag. Tinanong din siya ng mga Pariseo kung paano siya nakakita. Sinabi niya sa kanila, “Pinahiran niya ng putik ang aking mga mata, naghilamos ako pagkatapos, at ngayo’y nakakikita na ako.” Ang sabi ng ilan sa mga Pariseo, “Hindi mula sa Diyos ang taong iyan, sapagkat hindi niya ipinangingilin ang Araw ng Pamamahinga.” Ngunit sinabi naman ng iba, “Paanong makagagawa ng ganitong kababalaghan ang isang makasalanan?” At hindi sila magkaisa ng palagay.

Kaya’t tinanong nila uli ang dating bulag, “Ikaw naman, yamang pinadilat ni Hesus ang iyong mga mata, ano naman ang masasabi mo tungkol sa kanya?” “Siya’y isang propeta!” sagot niya. Sumagot sila, “Ipinanganak kang makasalanan at ikaw pa ang magtuturo sa amin?” At siya’y itiniwalag nila.

Nabalitaan ni Hesus na ang lalaking pinagaling niya ay itiniwalag ng mga Pariseo. Kaya’t tinanong niya ang lalaki nang matagpuan niya ito, “Sumasampalataya ka ba sa Anak ng Tao?” Sumagot ang lalaki, “Sino po ba siya, Ginoo? Sabihin ninyo sa akin, upang ako’y manampalataya sa kanya.” “Siya’y nakita mo na. Siya ang nakikipag-usap sa iyo,” ani Hesus. “Sumasampalataya po ako, Panginoon!” sabi ng lalaki. At sinamba niya si Hesus.

Ang Mabuting Balita ng Panginoon.

A. Pagmamasid

Subukan mong ipikit ang iyong mga mata ng ilang sandali at maingat na lumakad patawid ng iyong silid. Kahit siguro saulado mo ang iyong kuwarto ay posibleng ika’y mabangga o matisod dahil wala kang nakikita. Kahit ika’y hindi naman bulag, hindi ka rin makalalakad ng tuwid kung walang liwanag; maaari kang madapa sa dilim kung wala kang nakikita. Bukas ba ang iyong mata sa lahat ng nangyayari sa iyong paligid? Ginagamit mo ba ang liwanag ni Hesus upang maging gabay din sa pananampalataya ng iba?

B. Paghahawi

“Sumasampalataya ka ba sa Anak ng Tao?” Sumagot ang lalaki, “Sino po ba siya, Ginoo?” “Siya ang nakikipag-usap sa iyo,” ani Hesus. “Sumasampalataya po ako, Panginoon!” Juan 9:35-38

Pag-ugnay sa Ebanghelyo

Mapalad ang taong binuksan ni Hesus ang mata sa kaligtasan at kapangyarihan ng Panginoon habang ang iba ay nagbubulagbulagan sa katotohonan.

C. Pagtatabas

Totoo bang ika’y nakakakita? Nakikita mo ba ang pangangailangan ng ating kapwa lalo na ang mga naghihirap at may sakit?

D. Pagsasaayos

Minsan ay nagbubulag-bulagan tayo sa mga mapapait na katotohanan ng buhay. Nakikita lang natin ang nais nating makita dahil mas mahirap na tumulong sa kapwa lalo na kung hindi ito ayon sa ating pamumuhay. Paano kung may nag-aaway, hindi ba tayo tutulong upang sila’y magkabati?

Minsan pinipili din natin na maging tahimik dahil iniisip natin na wala tayong oras para tumulong. Paano kung kulang naman ang ating allowance at sapat lang ang meron tayo para sa ating sarili? Ito ang mga rason kung bakit tayo nahihirapang tumulong sa iba.

Ang panahon ng Kuwaresma ay pagkakataon na suriin ang ating sarili kung paano natin isinasabuhay ang mga turo ni Hesus. Maging liwanag tayo sa ating kapwa tulad ni Kristo. Kung tatanggalin natin ang putik sa ating mga mata ay makikita natin na napakarami nating pwedeng gawin para makatulong sa nangangailangan. Sa ating maliit at munting paraan ay may magagawa tayo hangga’t kumukuha tayo ng lakas sa Panginoon.

E. Pagdiriwang

Suriin at pagnilayan ang mga taong hindi natin pinapansin kahit alam nating nangangailangan. Ano ang pwede mong gawin ngayong linggo upang sa iyong munting paraan ay matulungan sila.

I-download ang katolago worksheet para sa linggong ito mula sa ating FB page na www.fb.com/katolago o sa www.katolago.com

Sources:

Yaman ng Salita, Word and Life Publications

Paghahawan, Diocese of Novaliches

Pagninilay sa gabay ni Rev. Fr. Niño Etulle, SCJ

Ang Pagpapahayag ng Salita ng Diyos, Volume I & II. Karapatang-sipi © Panayam ng mga Katolikong Obispo sa Pilipinas 2014, Lupon Rehiyonal Ukol sa Tagalog sa Liturhiya, Archdiocesan Liturgical Commission, Manila.

_______________________________________________________________